تو غنی از ہر دو عالم من فقیر ( اے اللہ ! تو دو جہانوں کو عطا کرنے والا ہے جبکہ میں تیرا منگتا و فقیر ہوں۔ (علامہ اقبال مرحوم)

                              تو غنی از ہر دو عالم من فقیر        
                              روز محشر عزر ہائے من پذیر
                                ور حسابم را تو بینی نا گریز    
                                 از نگاہ مصطفی پنہاں بگیر      

یہ رباعی علامہ اقبال مرحوم کی ہے۔  ایک شخص تھے محمد رمضان عطائی جن کا تعلق ڈیرہ غازی خان سے تھا ۔یہ علا مہ صاحب کے بڑے شیدائی تھے۔ یہ رباعی جب عطائی صاحب کو مولانا ابراہیم صاحب نے سنائی ، اور ایک عجیب پر کیف انداز میں سنائی کہ 

تو غنی از ہر دو عالم من فقیر   ( اے اللہ ! تو دو جہانوں کو عطا کرنے والا ہے جبکہ میں  تیرا منگتا و                                                 فقیر ہوں۔        

 روز محشر عزر ہائے من پذیر  (روز محشر میری معذرت کو پذیرائی بخش کر قبول فرمانا ( اور مجھے                                                بخش دینا)

ور حسابم را تو بینی نا گریز       اگر (پھر بھی) میرے نامہ اعمال کا حساب نا گزیر ہو تو پھر اے میرے                                                 مولی ! 

 از نگاہ مصطفی پنہاں بگیر        اسے میرے آقا محمد مصطفی ﷺ کی نگاہوں سے پو شیدہ رکھنا 

      

          مولانا کی آنکھوں میں آنسو رواں تھے اسی طرح عطائی صاحب کی کیفیت روتے روتے دگرگوں ہو گئی۔ اسی عالم وجد میں فرش پرگرے  اور بے ہوش ہو گئے۔یہ رباعی عطائی صاحب کے دل پر نقش ہو کر رہ گئی تھی۔ ایک مرتبہ ایک عجیب آرزو کی کونپل پھوٹی کہ کاش! یہ رباعی  میری ہوتی۔  یہ خیال آتے ہی علامہ صاحب کو خط لکھا

     آپ سر ہیں فقیر بے سر۔  آپ اقبال ہیں فقیر مجسم ادبار۔لیکن طبع کسی صورت کم نہیں پائی ـ 

      اور یہ لکھا  کہ فقیر کی تمنا ہے کہ فقیر کا تمام دیوان لے لیں اور یہ رباعی مجھے عطا فرمادیں۔

    اس کے جواب علامہ صاحب نے کچھ دنوں بعد لکھا کہ 

   جناب من! میں ایک مدت سے صاحب فراش ہوں خط و کتابت سے معزور ہوں۔ باقی شعر کسی کی ملکیت نہیں۔ آپ بلا تکلف  رباعی اپنے نام سے مشہور کریں۔

   حالانکہ علامہ صاحب نے یہی رباعی ارمغان حجاز کےلئے رکھی ہوئی تھی ۔ عطائی صاحب کو نظر کر دینے کے بعد انہوں نے اسے کتاب سے خارج کرکے ،تقریبا اسی مفہوم کی حامل ایک نئی رباعی کہی جو ارمغان حجاز میں شامل ہے۔

         بہ پایاں چوں رسد ایں عالم پیر        شود بے پردہ ہر پوشیدہ تقدیر
        مکن رسوا حضور خواجہ ما را           حساب من زچشم او نہاں گیر

    ترجمہ: (اے میرے رب ! روز قیامت) یہ جہان پیر اپنے انجام کو پہنچ جائے اور ہر پوشیدہ تقدیر ظاہر ہو جائے تو اس دن مجھے میرے آقا و مولا ﷺ کے حضور رسوا نہ کرنا اور میرا نامہ اعمال آپﷺ کی نگاہوں سے چھپا رکھنا)